Lajme

Blic Intervista || Vjosa Osmani: LDK ka pesë profile kandidatësh për Kryeministër që mund t’i fitojnë zgjedhjet

04/25/2018 13:10
nga:Gazeta Blic

Vjosa Osmani, njëra nga deputetët më të votuar në Kosovë dhe deputetja grua më e votuar, flet për ‘Gazeta Blic’ rreth pritjeve të saj nga tryeza e sotme e organizuar nga LDK, çfarë duhet të prodhojë ajo dhe se zgjedhjet e hershme duhet dominuar diskutimin mes partive pjesëmarrëse. Si thotë ajo, më mirë një dakordim për një datë të caktuar për zgjedhje dhe, në ndërkohë, gjatë kësaj periudhe parazgjedhore, të arrihet një pajtim për kalimin e temave me interes të përgjithshëm, e që kërkojnë zgjidhje të shpejta, sesa të vazhdohet me këtë situatë politike, pasojë e një Qeverie shpenzuese dhe jo përfaqësuese.


  • Çdo ditë e më shumë me këtë Qeveri po shihet regresi. Shumë më mirë do ishte të kemi një proces zgjedhor për ta bërë një Qeveri stabile edhe në numra.
  • LDK është e gatshme sot të shkojë në zgjedhje më shumë se kurdoherë tjetër.
  • Pa u caktuar data e zgjedhjeve, mendoj se do ishte joserioze të vendoset për kandidatin për Kryeministër.
  • LDK përkundër PDK-së, nuk është parti autoritare. Prandaj, ideja rreth tryezës, paraprakisht, para ftesës zyrtare nga Kryetari, është diskutuar në publik nga disa zyrtarë të LDK’së.

 (Intervista e plotë me deputeten nga LDK, Vjosa Osmanin)

 

Intervistuan: Adrian Çollaku & Petrit Musolli

Gazeta Blic: Zonja Osmani, lideri i partisë suaj u ka bërë thirrje partive politike që ta marrin pjesë në një tryezë ku do të diskutohen tema në vend, mirëpo fokusi ishte te zgjedhjet e parakohshme. A prisni pjesëmarrjen e partive tjera, sidomos të atyre në pushtet?

 Vjosa Osmani: Shumica dërmuese subjekteve politike parlamentare dhe jo parlamentarë që janë ftuar, tashmë, kanë konfirmuar prezencën e tyre. Tani vetëm mbetet të shihet se në çfarë niveli do të marrin pjesë, në qoftë se do të jetë në nivel të liderëve të partive, të nënkryetarëve apo të shefave të grupeve parlamentare.

Kjo, mendoj, se do të jetë pak e rëndësishme, por, çfarë është me rëndësi është që ne me këtë iniciativë synojmë të krijojmë kulturë të re politike në skenë tonë të arritjes së marrëveshjeve për zgjedhje, sepse, siç e kemi potencuar edhe në deklaratat e mëhershme por edhe në ftesë, diskutimi do të fokusohet në një datë që do të jetë dakordim i partive për zgjedhje të hershme.

Pra, jo zgjedhje të jashtëzakonshme, të cilat do të bëheshin brenda 30-45 ditëve, që nuk i japin kohë as KQZ-së, por krijohet edhe kogja njëfarë krize institucionale në raste të tilla, por, zgjedhje për të cilat do të darkodoheshim që për një periudhë të caktuar të shkurtër, sipas preferencës sonë të kryejmë detyra që janë më urgjente, që i takojnë edhe parlamentit edhe Qeverisë. Këtu, kryesisht, do të fokusoheshim në çështje që dalin nga agjenda e integrimit të Kosovës në BE, por, mbi të gjitha çështje që lidhen me liberalizimin e vizave. Siç e dini ne po presim, së paku vendime në disa prej organeve të BE-së, në Komisionin Evropian, pastaj në parlament, deri dikur kah qershori, korriku.

Natyrisht, që vendimi përfundimtar i takon shteteve anëtare. Mirëpo, është tepër me rëndësi që Kosova t’i kryejë të gjitha detyra e veta që të mos bllokohet cilido ligj që është i rëndësishëm për këtë proces, shkaku i zgjedhjeve. Pra, ky është synimi, të kemi zgjedhje të hershme dhe, natyrisht, që partitë politike mund të kenë në mendje edhe data të ndryshme.

Për neve si LDK është me rëndësi që kjo datë të bëhet sa më shpejt të jetë e mundshme.

Gazeta Blic: Ju thatë se shumica e partive parlamentare e kanë konfirmuar pjesëmarrjen. Po PDK e AAK?

 Vjosa Osmani: Për PDK nuk kam informata të sigurta, megjithatë, partitë tjera kanë dërguar konfirmimet nëpërmjet personave që janë caktuar zyrtarisht të flasin me ta.  Edhe AAK edhe Nisma edhe partitë opozitare kanë deklaruar se do të vijnë.

Siç thashë, nuk e dimë nëse do të vijnë në nivel të shefave të grupeve parlamentare apo të nënkryetarëve ose kryetarëve të partive, por, me rëndësi është që kushdo që vjen nga ta do ta shpreh qëndrimin e partisë së vet.

Për PDK-në nuk e di, por, nuk ka asnjë arsye që në tryeza të tilla politike, që sot po ftohet nga partia më e madhe në vend, që është LDK-ja, ku do të diskutoheshin çështjet që janë urgjente që të kryhen nga ana e institucioneve të Kosovës, në radhë të parë nga Parlamenti, sepse nëse ka zgjedhje të hershme, institucioni i parë që shpërbëhet është parlamenti, se Qeveria pastaj gjatë periudhës që organizohen zgjedhjet, është esenciale që të ketë një pajtim.

Në qoftë se krijojmë, siç e thashë, këtë kulturë të re politike të dakordimit rreth zgjedhjeve, procesi mund të shkojë shumë më mirë, shumë më transparent dhe, mbi të gjitha, edhe nuk do të pritej ndonjë parregullsi.

Gazeta Blic: Çështja e përfaqësimit, e keni lënë të jetë kompromis mes subjekteve që konfirmojnë pjesëmarrjen apo si do të vendoset niveli i përfaqësimit?

 Vjosa Osmani: Kjo nuk është çështje e kompromisit, është çështje e vullnetit individual e secilit subjekt. Ftesa ka shkuar nga Kryetari i LDK-së te kryetarët e partive tjera, është ftuar partia dhe, tani, i takon partisë që ta vendos se kë do ta dërgojë si përfaqësues. Mirëpo, me rëndësi është që përfaqësuesi që merr pjesë, natyrisht që mund të flasë në emër të partisë. Dikush që e di qëndrimin e partisë e ka atë të qartë dhe propozon ide dhe flet në emër të partisë. Besoj që në shumicën e partive do të jetë një nivel i lartë që do të ketë autorizimin që të diskutojë dhe të negociojë bashkë me partitë e tjera një datë të zgjedhjeve.

 Gazeta Blic: E kuptoj si çështje praktike. Por, niveli i përfaqësimit, realisht, tregon njëfarë serioziteti të një tryeze. Është parim?

Vjosa Osmani: Është parim, por, megjithatë, edhe nga ana e LDK-së do ta shohim tani se kë do ta autorizojë kryetari Mustafa. Me gjasë do të jetë njëri nga nënkryetarët. Siç e thashë, kjo varet nga rrethanat objektive në secilën parti politike. Nganjëherë, siç e kam parë te disa parti politike, meqenëse, shefat e grupeve parlamentare merren me punë të përditshme të partisë, me qëndrimet që mbahen në grup parlamentar që nganjëherë janë edhe shumë më të informuar sesa vetë strukturat e larta të partisë.

Kështu që, unë, personalisht, e shoh më shumë si çështje praktike sesa kemi parë në të kaluarën se shumë takime janë mbajtur në nivel të liderëve por nuk është që ka pasur ndonjë rezultat. Me rëndësi është që ta bëjmë një hap të parë. Në qoftë se kjo tryezë shkon mirë, unë besoj që tryeza e dytë, definitivisht do të mbahet edhe në nivel të liderëve të partive politike dhe mund të arrihet një përafrim i qëndrimeve rreth datës së zgjedhjeve, por, edhe rreth temave që duhet të kryhen gjatë asaj periudhe.

Edhe aty mund të kemi mospajtime, edhe aty, ndoshta, partitë që janë Qeveri dëshirojnë tema komplet tjera t’i kryejnë me ngut , përderisa ne nuk jemi për diçka të tillë. Jemi kryesisht të fokusuar në ligjet apo çështjet që i takojnë Parlamentit që duhet të kalojnë dhe lidhen me procesin e liberalizimit.

Gazeta Blic: Cilat munden të jenë ato temat që ju frikësoheni se mund të nxisin një destabilitet politik nëse nuk u ipet ajo periudha kohore parazgjedhore për t’i tejkaluar?

Vjosa Osmani: Ka tema, të cilat domosdoshmërish kërkojnë koordinim edhe me partnerët tanë. Për shembull, çështja e transformimit të FSK-së në Ushtri. Është temë në të cilën është dëshmuar që Kosova nuk mund ta bëjë vetë pa mbështetjen e fuqishme të Shteteve të Bashkuara dhe anëtarëve të tjerë të NATO-së.

Përndryshe, ne do ta bënim një transformim që do të kishte efekt vetëm një copë letër. Por, në fakt, nuk do ta kishte mbështetjen e anëtarëve të NATO-së, qoftë në trajnime, qoftë në aspektet e tjera. Nuk do të mund të ecnim përpara as në procesin për partneritet për paqe që është si parahap për anëtarësim në NATO, por as në procesin e lobimit për NATO. Kështu që ky është proces që nuk mund ta bëjmë ne brenda muajit duke anashkaluar faktin që koordinimi me partnerët tanë është i domosdoshëm, kjo është e para.

Mirëpo, çështje tjera, siç janë disa ligje që lidhen me luftimin e krimit dhe korrupsionit, ato absolutisht, në momentin që i sjell Qeveria, Kuvendi duhet ta luajë një rol ekspeditiv dhe në procedura jo të përshpejtuara, ashtu brenda ditës, por, së paku brenda muajit t’u jap më shumë përparësi atyre ligjeve, në mënyrë që ato të kalohen dhe të raportohet në organet themelore, ku vendoset brenda BE-së për këto tema, që këto detyra, tashmë, janë kryer. Këto, ne tash i kemi prioritet, se çfarë do të kërkojnë partitë tjera është çështje tjetër.

Po flitet, për shembull, për reformën zgjedhore. Tash ne dëgjojmë shumë njerëz që fare nuk kanë qenë pjesë e këtyre proceseve që mendojnë që kjo është një punë që duhet të fillojë nga zero. Në fakt, në mandatin 2010-2014, siç e dini, ka ekzistuar një komision për reformë zgjedhore, i cili ka punuar gati dy vite, nëse nuk gaboj, është udhëhequr nga LDK-ja në atë kohë dhe atëherë patëm bërë një punë të madhe në shumicën e çështjeve teknike do të thoja, kërkesave të KQZ-së, sepse, ata, më së shumti i detektojnë problemet që i kanë në terren gjatë procesit zgjedhor. Ato janë adresuar , mirëpo nuk ka pasur pajtim mes partive politike lidhur me zonat zgjedhore.

Nuk ka pasur pajtim në mes të partive politike për numrin e personave që mund të votohen në listë. Ka pasur dallime për çështje të tilla, të cilat sot në qoftë se i hapim nuk mund të kryhen brenda dy muajsh apo tre muajsh.

Patjetër që do të marri kohë, po unë mendoj që në qoftë se dikush do ta trajtojë çështjen e reformës zgjedhore në këtë periudhë, para zgjedhjeve të hershme, atëherë, thjesht, duhet të merret ai material i gatshëm që është përgatitur nga Komisioni për Reformë, para disa vitesh, të rishikohet brenda muajit dhe ai mund të kalojë.

Mirëpo, temat që kërkojnë edhe ndryshimet kushtetuese, për shembull, dikujt mund t’i shkojë mendja me i mbyllë listat në zgjedhje, për një gjë të tillë do të duhej të ndryshonte Kushtetuta. Pra, këto tema që kërkojnë negociata politike shumë më të gjata dhe më të thella, në mes të partive, nuk mund të kryhen brenda 2-3 muajsh.

Gazeta Blic: Cilat tema mendoni do të marrin më shumë kohë në diskutimin ndërmjet partive. A do të jetë reforma zgjedhore?

Vjosa Osmani: Ne, si LDK, insistojmë që data e zgjedhjeve të jetë sa më e hershme dhe tema themelore në atë tryezë. Besoj që edhe partitë tjera opozitare nuk kanë arsye që të mos pajtohen me diçka të tillë. Kurse, partitë në pushtet, qëllim kryesor e kanë që të jenë në pushtet, dhe të vazhdojnë të jenë në Qeveri. Ata mund të insistojnë që të diskutohen tema të tjera. Por, siç e thash, kjo Qeveri nuk e ka shumicën dhe nuk mund të imponojë asgjë.

Gazeta Blic: Ideja e tryezës së LDK-së, ka ardhë prej shumë akterëve të LDK-së dhe nuk është prezentuar nga një zë, si, për shembull, nga Kryetari i LDK-së. Ai reagoi menjeherë pas platformës së Kadri Veselit, a mendoni që ka qenë një lëshim i LDK-së kjo?

Vjosa Osmani: Në LDK, ne e kemi lirinë e plotë që për çështjet e ndryshme të tilla të interesit nacional, të flasim secili që e kemi legjitimitetin popullor. Pra, secili që ka fituar votën e popullit dhe ne kemi marrë besimin e tyre. Sepse, çështja e zgjedhjeve i prek interesat e tyre. Kurse, në PDK, është qëndrimi autoritar, ku askush përveç liderit nuk del për të folë për tema të tilla. Mendoj që kjo tregon që në LDK ka diçka më pozitive, sa i përket zhvillimeve në krahasim me PDK. Idenë e kemi diskutuar brenda Grupit Parlamentar, disa prej nesh, pastaj, kanë pasuar diskutime me liderin e LDK-së, akoma sa ka qenë në Gjermani, lidhur me çështjen e tryezës. Si hap i parë, pastaj, kemi dalë disa prej nesh. Nuk e di se kush ka fol i pari apo i dyti, rreth kësaj çështje, rëndësi ka se ne kemi folur si LDK.

Gazeta Blic: Një çështje tjetër është se po thuhet që LDK dëshiron të shkojë në zgjedhje parlamentare, para se t’i mbajë zgjedhjet e brendshme, a po e sheh LDK rrezik se mund të përçahet nëse hyn në zgjedhje të brendshme?

Vjosa Osmani: Arsyeja e vetme pse po kërkojmë zgjedhje të hershme është për shkak se, siç e thash, çdo ditë e më shumë e qëndrimit të kësaj Qeverie në pushtet është humbje e madhe për Kosovën. Humbje në hapa, humbje në agjendën e integrimit euroatlantik, humbje në buxhet, humbje në të gjitha kontekstet. Dhe në qoftë së dëshirojmë ta ndalim këtë regres të Kosovës, zgjedhjet janë zgjidhje e vetme. Kjo është arsyeja themelore, dhe nuk ka tjetër.

Gazeta Blic: Nëse partitë në pushtet nuk marrin pjesë në tryezë, a do të artikuloni kërkesat, a do negocioni me partitë opozitare për një qëndrim të përbashkët, çfarë do të bëni, a do të vazhdoni me mocion?

Vjosa Osmani:  Në fakt partitë opozitare  shqiptare i kanë diku 57 vota. Ne, do të mund ende të vazhdonim nëpërmjet ndërtimit të  qëndrimeve tona të përbashkëta të opozitës  shqiptare dhe në ndërkohë të fillojmë diskutimet. Më pas,  tjetra, qoftë me partitë në pushtet qoftë edhe me pakicat, sepse, ne nuk mund të sillemi kinse situata në Kosovë, sa i përket  funksionimit të institucioneve, është stabile, sepse, nuk mund të pretendojmë se një qeveri që sot i ka vetëm 52 vota mund të marrë vendime legjitime për vendin dhe, në veçanti, me temat që kanë të bëjnë, për shembull, me dialogun me Serbinë ose funksionimin e institucioneve publike, e aq më pak të menaxhojë me buxhetin e shtetit. Ose më mirë të them, të keqmenaxhojë, siç ka bërë deri tani. Andaj, opozita, duhet të jetë jashtëzakonisht aktive  në organizmin e vet të përbashkët dhe, tek e fundit, të kërkojë ato katër votat e fundit që na duhen, në mënyrë që, nëse të  gjitha ato përpjekje nëpërmjet  tryezave të dështojnë, atëherë, ta përdorim  masën e vetme që mbetet, e që  është mocioni.

Por, për mocionin, duhet të përgatitemi mirë, të sigurohemi që votat janë të sigurta, sepse, nëse dështojmë, atëherë, 6 muaj të tjerë nuk do të mund të provojmë prapë. Prandaj, nuk e kemi ndërmend të provojmë pa i pasur votat e sigurta, të paktën, të  kemi pak më shumë se  61 dhe, natyrisht, që do t’i marrim me nënshkrime të gjitha para se të hidhet në votim, por, tani jemi të fokusuar në përpjeke për tryezë politike për të gjetur një datë për zgjedhje të hershme.

Dhe, edhe nëse përpjekja e parë nuk del aq e suksesshme, ne, nuk do të ndalemi.

Gazeta Blic: Kur i bie zgjedhje të hershme, ngase e përmendet që disa herë zgjedhje të hershme, kur është ajo  datë, ai muaj?

Vjosa Osmani: Ne nuk kemi dal më propozim shumë konkret për shkak se, në qoftë se fton një tryezë politike e kërkon mendim edhe të tjerëve, natyrisht që duhet  me marrë parasysh qëndrimet e të gjithëve dhe në fund të gjendet diçka  si kompromis.

Gazeta Blic: A është brenda këtij viti, apo vitin e ardhshëm ?

Vjosa Osmani: Unë personalisht mendoj se nuk duhet të lihet kjo punë për vitin e ardhshëm

Mendoj që duhet të ketë brenda këtij viti, sepse, dikush thotë me zgjedhje mund të humbet kohë edhe buxhet. Por, unë mendoj se është pikërisht e kundërta,  me zgjedhje të hershme edhe  fitojmë në kohë edhe ruhet, në një masë, buxheti për  dy arsye:

E para, sepse çdo ditë e më shumë me këtë Qeveri po shihet regresi. Po shihen hapat mbrapa, rrjedhimisht, edhe me kohë  jemi duke humb aq shumë, saqë, shumë më mirë do ishte të kemi një proces zgjedhor që bëhet brenda pak muajsh, e  për ta bërë një Qeveri që është stabile edhe në numra, por, edhe në vendimet që i merr, e mbi të gjitha ka orientim  të qartë strategjik pro perëndimor, që në asnjë moment nuk  vë asnjë dyshim në atë orientim nëpërmjet veprimeve të veta, sepse, është shumë lehtë të bëjmë dokumente dhe retorika se ne jemi pro-perëndimor, por, pastaj, të krijojmë krizë pas krize, të cilat, pastaj, krijojnë dyshime tek vendet mike për orientimin perëndimor të Kosovës.

Dhe e dyta, në aspektin e buxhetit, mund të kushtojnë diku 5 milionë nëse, nuk gaboj zgjedhjet  e hershme. Megjithatë, nëse i shohim  vendimet e kësaj Qeverie, 60 milionë aty, 60 milionë aty, atëherë, shumë më mirë është të parandalohen raste të tilla në të ardhmen dhe, në këtë mënyrë, të ruhet buxheti i shtetit, të përdoret me ligjet që janë në fuqi dhe jo sikur të ishte buxhet personal  i xhepave që sot udhëheqin me Qeveri dhe, rrjedhimisht, në këtë mënyre do të formonim një Qeveri që do të udhëhiqet nga LDK-ja me partnerë të tjerë më të vegjël, që do ta përdorte buxhetin për interesa të qytetarëve, nuk do ta keqpërdorte atë dhe, rrjedhimisht, do t’i përshpejtonte hapat përpara të Kosovës dhe jo vetëm efektin e integrimit evropian, por, edhe aspektet tjera, agjendat bilaterale dhe anëtarësimin në organizata ndërkombëtare

GazetaBlic: Sa është LDK e gatshme të hyjë në zgjedhje brenda pak muajsh siç thoni ju, kur në njërën anë ka kryetarin e saj që ka probleme shëndetësore dhe në anën tjetër kemi ambiciet  të disa individëve, edhe publikisht e kemi Kryetarin e komunës së Pejës, i cili tha pse mos të jem kandidat për kryeministër ?

Vjosa Osmani: LDK është e gatshme sot të shkojë në zgjedhje më shumë se kurdoherë tjetër.

GazetaBlic: Por nuk e dini kënd e keni kandidat për kryeministër ?

Vjosa Osmani: Po nuk  besoj që asnjëra parti e di sot se kënd do ta kenë kandidat për kryeministër

GazetaBlic: Liderët i kanë kandidatë për kryeministër

Vjosa Osmani: Jo domosdoshmërish liderët janë kandidat për kryeministër, mund të ketë befasi nga partitë e tjera, nga ajo çka dëgjojmë brenda në Parlament

Gazeta Blic: A do të jetë Gazmend Muhaxheri kandidat për kryeministër?

Vjosa Osmani: Nuk e di, për shkak se pa u caktuar data e zgjedhjeve, unë, mendoj se do ishte joserioze të ulen organet e partisë për të vendosur për kandidatin për kryeministër.

Megjithatë, në momentin që caktohet data e zgjedhjeve dhe, përshmebull, merremi vesh për zgjedhje, atëherë, do të ketë periudhë 2-3 muaj, brenda së cilës, organet e partisë, strukturat, do të diskutonin për të gjithë emrat e mundshëm.

Por, pyetja e vetme e rëndësishme është: Me kë i fitojmë zgjedhjet, asgjë tjetër.

GazetaBlic: Por, në zgjedhjet e fundit kishit një kandidat, i cili doli pas  shpalljes së zgjedhjeve, mirëpo, tregoi se ishte kohë e pamjaftueshme, mendoj se edhe dy muaj do të jenë të pamjaftueshme për një kandidat dhe, kësisoj pra, a do  t’i hyni garës?

Vjosa Osmani: Unë nuk mendoj se ka qenë aty problemi, ka qenë krejt tjetër, problemi ka qenë dëmi që e ka pësuar LDK, për shkak të koalicionit me PDK, por, unë mendoj se, pavarësisht kandidatit tonë, dëmin themelor, LDK, e ka pësuar shkaku i koalicionit me PDK,  që nuk miratohej nga shumica e elektoratit, pavarësisht punës që është bërë nga Qeveria e LDK-së.

E dyta, kanë qenë zgjedhje të jashtëzakonshme, periudha ka qenë shumë më e shkurtë. Në qoftë se ka zgjedhje të hershme, ka edhe disa muaj më shumë, në mënyrë që edhe brenda LDK, procesi të shkojë më mirë, më ngadalë, të konsultohen të gjitha organet, Grupi Parlamentar, të gjithë njerëzit që mund t’i ndihmojnë LDK-së që të dalë e para.

Por, kush do jenë emrat potencial, nuk e di, është herët, mund të ketë shumë, është krejtësisht normale, në fakt, do ishte fatkeqësi për një parti në qoftë se nuk ka njerëz që vërtetë besojnë në potencialin  e tyre për të fituar zgjedhjet.

GazetaBlic: A keni menduar ndonjëherë të jeni  kandidate për kryeministër nga LDK-ja?

Vjosa Osmani: Në fakt, në qoftë se flas për ambiciet e mija personale, ato gjithmonë lidhen më shumë më akademinë, sesa me politikën, në qoftë se do flisja se çka saktësisht kam dëshirë unë të bëjë….

GazetaBlic: Në fakt e keni edhe një, ta themi, një favorizim ngase jeni më e votuara, sidomos në aspektin gjinor, a mendoni se ky do  jetë favor nëse jeni kandidate?

Vjosa Osmani: Kjo varet nga shumë rrethana dhe për momentin, asnjëra nga to, nuk janë të qartësuara në LDK, e para varet nga ajo  se a do të kemi zgjedhje të hershme, vetëm në momentin kur vendoset për një gjë të tillë unë personalisht do të  filloja të mendoja për këtë si temë.

Për mua, për momentin, kjo nuk është temë. Prandaj, edhe nuk e mendoj derisa nuk ka datë të zgjedhjeve, në momentin kur ka datë,  atëherë, do të kem përgjigje të qartë.

Mirëpo, e vetmja që e mendoj për momentin, pa emra, pa individë,  është që duhet secili prej nesh, pavarësisht a jemi deputet  a jemi struktura a nëndegë, duhet ta bëjmë një pyetje themelore, ajo është, me kë i fiton LDK-ja zgjedhjet, me kë i ka shanset më të mëdha për të arritur rezultate më të mira të mundshme, sepse, LKD i ka disa që munden me arrit shumë, ka kandidat të mirë, anekënd LDK-së që do të mund të siguronin një sukses.

Por, esenca në sistemin tonë zgjedhor është që të shënohet një fitore e thellë, në mënyrë që të kemi nevojë pastaj vetëm për disa parti  ose partnerë më të vegjël dhe, mos të vijmë në një situatë ku partitë e tjera kushtëzojnë, qoftë më pozitën e kryeministrit, qoftë me diçka tjetër. LDK, duhet të marrë së paku 40 deputetë në zgjedhjet e ardhshme.

GazetaBlic: E vetme apo në koalicion ?

Vjosa Osmani: E vetme. Duhet të shikojmë se cila është lista, jo vetëm individi, por, cila është lista që synon fitore të thellë dhe kjo, më pas, është ajo për të cilën unë kam insistuar me vite të tëra në LDK, ende nuk kam marrë përkrahje. Kandidati për Kryeministër duhet të dal në fushatë me tërë kabinetin e vet.

Pra, të tregojmë qysh më parë se kush do të jetë ministër i mbrojtjes  apo në këtë rast i FSK, kush do jetë ministër i jashtëm, i integrimeve e tjerë.

Njerëzit duhet ta dinë, paraprakisht, kush do jetë ministër, ta dinë a janë të pastër, çfarë bagazhi politik  kanë ata.

Dhe, jo të fokusohen vetëm në një person që do jetë kryeministër dhe do ta drejtoj punën e Qeverisë, sepse, nganjëherë, një person që –  jo që nuk ka kapacitet për punë, por, ka qëllime të këqija e njollosë tërë punën e atij ekipi.

Prandaj, do kisha pas dëshirë, vërtetë, që kushdo që nesër është kandidat për kryeministër nga LDK, të dalë në fushatë me kabinetin e vet, qytetarët ta dinë se çfarë përbërje të Qeverisë do të votojnë dhe jo vetëm kryeministrin.

LDK ka pesë profile kandidatësh për Kryeministër që mund t’i fitojnë zgjedhjet

GazetaBlic: Në përgjithësi, subjektet tona politike, kur arsyetojnë kandidaturat  për kryeministër, gjithmonë i referohen elektoratit të vet që është më i pranueshëm brenda elektoratit të vet. Ne e dimë se kandidati për kryeministër duhet të jetë i pranueshëm përtej elektoratit të vet, të ketë një pranim më të gjerë. Nëse ju keni matje, sa profile të tilla ka brenda LDK-së që mund të fitojnë vota përtej elektoratit të LDK-së.

Vjosa Osmani: Unë nuk e di nëse LDK ka bërë një matje të tillë, porato duhet të bëhen shumë afër zgjedhjeve, meqenëse, edhe ju e dini se opinioni ndryshon shumë shpejt, një votë në Kuvend për çështje të caktuar, një fjalim në Kuvend, një votë pro ose kundër e determinojnë atë se si elektorati e sheh një politikan të caktuar.

Andaj, ato duhen bërë më afër zgjedhjeve, së paku një muaj para zgjedhjeve.

Ka matje që i bënë NDI, të  financuar nga Qeveria amerikane, për figura të ndryshme politike, përfshirë edhe mua, edhe njerëz të tjerë brenda LDK dhe partive tjera.

Ka matje të KDI dhe organizatave të tjera, nganjëherë i shohim, nganjëherë jo. Por, megjithatë, LDK duhet ta bëjë matjen e vet dhe ta shohim kush shkon përtej elektoratit të LDK.

Por, megjithatë, LDK qëndron shumë mirë në kohën e fundit, shumë  më mirë se që kemi qenë në sondazhet e kaluara. Në këta muajt e fundit, dalim shumë më mirë sesa partitë tjera, për shkak të qëndrimeve tona, punës sonë, nga zgjedhjet e qershorit e këndej.

Dhe, kjo ka të bëjë te elektorati, që ne e quajmë elektorat i fjetur, të cilët pas vdekjes së Presidentit Rugova, nuk kanë qenë aktiv, nuk kanë dal të votojnë. Është numër i madh, tek ata janë ringjallë shpresat që LDK shihet si alternativë.

GazetaBlic: Kjo përkrahje është rrit për LDK si parti në tërësi, pa paragjykuar për kandidatin?

Vjosa Osmani: Ashtu dalin sondazhet për Lidhjen Demokratike.

GazetaBlic: Por, a mundet të ndikojë kandidati, i qëlluar ose jo i qëlluar..?

Vjosa Osmani: Po, natyrisht, në çdo parti politike, nëse s’ja qëllon me kandidatin, mund ta dëmtosh partinë, nëse ja qëllon atëherë mundesh  ta rrisësh partinë edhe përtej parashikimeve aktuale.

Mirëpo, për momentin, këto biseda, nuk janë duke u bërë në LDK.

Ambiciet personale të njerëzve janë krejtësisht në rregull, megjithatë. nuk ka diçka sa i përket konsultimeve ose mendimeve, nuk është temë në asnjë strukturë vendimmarrëse çështja e kandidatit për kryeministër.

Por, nëse kemi datë për zgjedhje, patjetër kjo do jetë temë urgjente.

GazetaBlic: Megjithatë, kisha insistuar, meqenëse jeni të familjarizuar me LDK’në, sa profile mendoni se i ka të tilla LDK-ja, në katër brezat brenda që pretendoni ju se janë?

Vjosa Osmani: Nuk kam pretenduar asnjëherë se janë katër breza brenda LDK-së.

GazetaBlic: Jo, po flas për të tjerë. Por, a mund të na thoni ju, përafërsisht, sa persona të tillë mund të keni?

Vjosa Osmani: Unë mendoj që 5 profile mund t’i fitojnë zgjedhjet. Mirëpo, diferenca që mund të shkaktojnë këta persona do të varionte.

GazetaBlic: Vitin e ardhshëm LDK hyn në zgjedhje të brendshme, në maj të vitit 2019, a ekzsiton rreziku që LDK të përçahet, pasi që e dimë që janë tri grupacione, që kanë ambice që ta kenë kreun e parties?

Vjosa Osmani: Dikush po thotë janë tri grupe, dikush pesë. Për momentin, sa më përket mua, kjo nuk është temë që e diskutoj, qoftë me strukturat e LDK-së, qoftë më te tjerët, e diskutoj në kontekst të organizimit të tyre të mirë, në përputhje me parimet e lirisë së individit, që është një ndër parimet themelore të partive të djathta, që nënkupton që njerëzit brenda LDK-së, duhet të jenë të lirë, t’i shprehin mendimet apo ambiciet, qoftë të kandidojnë, apo të tregojnë së kë dëshirojnë ta shohin ata në krye LDK-së, vitin e ardhshëm. Pra, duhet të ekzistojë një liri e tillë. Aty votojnë 355 delegatë dhe aty nuk pyetet një anëtar.

Gazeta Blic: A do të ketë kandidat konsensual, apo do të ketë garë

Vjosa Osmani: Natyrisht që do të ketë garë. Mirëpo, kush do t’i hyjë garës nuk e di. Me këtë statut, këtë temë do ta mendoj në vitin 2019. Në poltiikë gjërat ndryshojnë shumë shpejtë dhe, unë, tani, nuk e mendoj këtë gjë. Por, kur të vijë momenti, pra, në vitin 2019, kam shumçka për të thënë për këtë gjë.

Gazeta Blic: Pra, s’do të ketë kompromis për Kryetarin?

Vjosa Osmani: Po, statuti nuk na lejon një gjë të tillë. Ne, LDK, të gjithë janë vetëdijesuar që procesi i zgjedhjes duhet të jetë me votë të fshehtë. Ashtu siç e kërkon statuti, më së paku dy kandidat. Kam dëgjuar edhe njerëz tjerë duke thënë kështu. Më vjen mirë që po respektohet statuti dhe gara i bënë mirë demokracisë së brendshme. Rëndësi ka që gara brenda kujtdo qoftë që bëhet. Të ketë kulturë të debatit të mirëfilltë dhe të kuptohet që kushdo që është kandidat, ka qëllim që LDK-në, ta çojë përpara. Dhe, që 355 delegatë të mendojnë se çka do të ndodhë me 1 qershor, me këdo që e zgjedhin, në qoftë se ai person do të arrijë të dalë para liderëve aktual të partive tjera.

Në qoftë se ai person do të arrijë të fitojë përpara Albin Kurtit, Kadri Veselit, Ramush Haradinajt dhe të gjithë të tjerëve, kjo është pyetja që do të duhej ta bënim të gjithë, nëse do të jemi delegatë. Kjo, për mua ka rëndësi, jo se me kë i kam raportet e mira, sepse, unë mund të kem raporte jashtëzakonisht të mira dhe korrekte me anëtar të LDK-së, mirëpo, ata, ndoshta, nuk do të mund t’i fitojnë zgjedhjet në të ardhmen. Pra, me rendësi është që secili prej nesh të shikojë jashtë individit, jashtë personales. Përtej asaj se çka na bjen neve më mirë, por, duhet të shikojmë se çka i bjen mirë LDK-së, në një proces zgjedhor, sepse një LDK e fuqishme është dëshmuar historikisht që nënkupton një Kosovë të fuqishme.
Gazeta Blic: Ju e përmendet që në vitin 2019 keni shumëçka për të thënë. Nëse shkon tash çdo gjë mirë si e thatë ju, megjithatë, a mbetet diçka e parregulluar, në proces apo organizim, për të cilën ju do të flisni me 2019?

Vjosa Osmani: Unë mendova që në vitin 2019, kam çfarë të flas për procesin e zgjedhjes, për kandidaturat, kam çfarë për të thënë për platformat, të cilat i paraqesin kandidatët e ndryshëm, për idetë e ndryshme, mirëpo, për momentin, nuk ka kandidatura zyrtare, shprehjet e ambiceve nuk janë kandidaturë zyrtare. Mos harroni që në vitin 2015, deri ditën e fundit ka pasur emra, madje, edhe ju në ‘Gazeta Blic’ i keni përmend si kandidatë potencial, ndërsa të nesërmen, nuk kanë kandiduar fare. Unë po flasë për kandidurat zyrtare, do të ishte mirë që ato të paraqiten në muajin prill, një muaj më herët dhe të kenë mundësinë që të paraqesin platformën e tyre para delegatëve dhe debatet të jenë në kulturë të lartë politike, t’i jepet mësim partive tjera dhe të tregohet që LDK-ja, edhe pas një procesi të tillë, del edhe më e fuqishme dhe më unike.

Nëse këto parime merren parasysh, nuk besoj që do të ketë hapësirë për përçarje, edhe brenda statutit aktual. Dhe, angazhimi i secilit prej nesh, tani duhet të jetë këtu, që raportet të mbesin korrekte, që kontaktet të mos ndërpriten, sepse, ndonjëherë, e kemi parë që mungesa e kontakteve krijon shumë keqkuptime dhe, pastaj, të ketë liri. Liria e secilit në këtë proces është çelësi që procesi të përfundojë si duhet për LDK dhe për Kosovën.

Unë e di që ka shumë intersim për këtë proces zgjedhor, megjithatë, për momentin, të gjitha këto tema nacionale që i kemi mbi tavolinë, asnjëri prej nesh nuk duhet të hargjojë energji për diçka që do të ndodhë në vitin 2019. Unë, tani të gjithë kohën e kam të përqendruar në Kuvend dhe çështjet, siç është dialogu me Serbinë dhe në parandalimin e skenareve, ku Kosova do të humbte lidhur me keqmenaxhimin që po e bënë Qeveria e Kosovës. Ne, si opozitë e fuqishme, duhet këtu të fukosohemi sot, në energjinë tonë dhe jo të çërojme hesape njëri me tjetrin. Sepse, zgjedhjet e brendshme, janë vitin tjetër. Nga janari e andej hapet tema e zgjedhjeve.

Dialogu ka mbetë i vetmi imunitet i Thaçit

Gazeta Blic: Si e komentoni Platformën e Qeverisë për dialogun, që krahasuar me seriozitetin që ka treguar, për shmebull, Serbia, një proces i udhëhequr nga Presidenti, për të hartuar një platformë për Kosovën është debatuar me të gjitha instancat e faktorët me ndikim në shoqërinë serbe. Këtu u dorëzua kjo Platformë pa i’u nënshtruar një debati të ngjashëm?

Vjosa Osmani: Absolutisht. Ajo çfarë ka bërë Qeveria e Kosovës me Platformën, duke anashkaluar debatin, duke anashkaluar Kuvendin, shoqërinë civile… Është një proces jetik, ky është një prej gabimeve më të mëdha që ka bërë Qeveria e Kosovës gjatë këtyre muajve sa është në pushtet, përderisa e kanë gojën plot konsensus dhe veprimet e tyre shkojnë në krejt diçka tjetër, edhe pse kur është miratuar në Qeveri, është thënë që kjo do të shkojë në Kuvend për debat dhe miratim, prapë se prapë, Kryeministri Haradinaj, duke i’a dorëzuar Presidentit Thaçi, tregon se nuk i intereson as zëri i opozitës dhe as zëri i shoqërisë civile dhe askujt tjetër.

Ata, dëshirojnë që të bëjnë marrëveshje, që në fakt, nëpërmjet kësaj Platforme, mbronë më shumë interesat e tyre personale sesa ka synim të mbrojë interesat e Kosovës. E kam thënë edhe më herët që Hashim Thaçi, e vetmja armë e imunitetit që i ka mbetur është dialogu.

E vetmja mënyrë e faktorizimit para komunitetit ndërkombëtar, përderisa është defakorizu totalisht me fajin e tij brenda Kosovës, madje, edhe brenda ish-partisë së tij, i ka mbetur vetëm dialogu dhe ai po e shfrytëzon këtë. Por, një Qeveri serioze, e cila mendon për Kosovën, nuk do ta lejonte një gjë të tillë. Nuk do ta lejonte që ta hedhte barrën komplet mbi një person që ka qenë, asgjë tjetër përveç faktor përçarës, që nga dita parë kur është zgjedhur, ku ka marrë iniciativa që i kanë shkaktuar dëme të pariparueshme Kosovës ndërkombëtarisht, siç ishte nisma për shfuqizimin e Gjykatës Speciale, apo involimi i supozuar për arrestimin e gjashtë shtetasve turq.

Pra, kjo dëshmon që e kanë për qëllim që këtë dialog ta bëjnë pa përkrahjen e qytetarëve, mirëpo, të jenë të sigurt që pa përkrahje të qytetarëve, ata nuk mund të bëjnë asnjë marrëveshje. Ata, mund të nënshkruhen, mund t’i bashkojnë duart, mund ta sjellin atë dokument në Kosovë dhe mund të na quajnë neve të tjerëve që jemi kinse kundër normalizimit, mirëpo, marrëveshja nuk do të kalojë, në qoftë se nuk janë mbrojtur interesat e Kosovës. Në qoftë se nuk janë mbrojtur integriteti i Kosovës, as nuk kanë çka provojnë të sjellin marrëveshje të tilla në Kuvend.

Madje unë nuk e di se si pretendon Qeveria ta hedh komplet barrën e dialogut me shtetin serb te Presidenti Thaçi, kur ne si Kuvend, nuk kemi mekanizma mbikëqyrës të punës së tij. Me Qeverinë është situatë komplet ndryshe, sepse, kemi pyetje parlamentare, kemi interpelanca, kemi raportime, mbi të gjitha kemi mocionin e mosbesimit. Me Presidentin nuk e kemi një mundësi të tillë, siç e dini, kjo mund të shkojë vetëm përmes vendimit të Gjykatës Kushtetuese, ky është një proces shumë i ndërlikuar, por, Presidenti do të mundohet që gjithë këtë ta bëjë në mënyrë të fshehur dhe neve të na vendos para një situate të kryer. Mirëpo, me një Qeveri me 52 vota, nuk do të arrijë të bëjë një gjë të tillë. Ne, kemi kundërshtuar këtë pjesë të Platformës sa i përket përcaktimit të Thaçit në dialogun me shtetin serb.

Ajo Platformë tregon se sa jo serioze është Qeveria për çështjet që janë me rëndësi për qytetarët. As nuk janë përcaktuar temat, për të cilat dialogu ynë do të duhej të insistonte, siç është tema e të pagjeturve, dëmeve të luftës dhe, as nuk është përcaktuar afati kohor për të cilën do të duhej të përfundonte ky process.

Dhe, ka shumë gjasa që me një dokuement të tillë atyre t’iu krijohet një hapësirë e mjaftushme që të arrijnë koncesione që e demtojnë funksionalitetin e brendshem të Kosovës. Mos harroni, Bosnja është anëtare e OKB-së, por, është jofunksionale, për shkak të koncensioneve të tilla. Ne, nuk do të duhej të lejojmë që një gjë e tillë të ndodhë më Kosovën, sepse, as ulësja e OKB-së nuk na duhet, kur nuk mund të marrim as vendimet elementare, pa pajtimin e pakicës serbe.

Gazeta Blic: Nëse do ta ketë përkrahjen e ndërkombëtarëve kjo Platformë, sepse, si dihet, ndërkombëtarët ne Kosovë kanë ndikim të jashtëzakonshëm?

Vjosa Osmani: Është e vërtetë që ndërkombëtarët kanë ndikim të madh. Mirëpo, Kuvendi i Kosovës e ka dëshmuar që këto vite, që në qoftë se një marrëveshje ndërmjet Kosovës dhe Serbisë është e dëmshme ajo nuk do të kalojë. Me një Qeveri me 52 vota s’ka mundësi që marrëveshjet të kalojnë. Pra, patjetër duhet edhe miratimi i së paku njërës nga partitë opozitare. Disponimi i LDK-së dhe as elektorati nuk e përkrahë që bisedimet të udhëhiqen nga Presidenti dhe që të shkojë kështu pa pasur platformë të qartë se për çka ky delegacion do të luftojë.

Por, në këtë mënyrë, Thaçi, çfarë ka bërë, ka qenë qartë se edhe pa miratimin e Kuvendit ka bërë negociata të fshehura dhe takime të shumta me Vuçiqin. Askush në Kosovë nuk e di se çka kanë diskutuar. Më shumë kanë informacione shtetet tjera sesa ne. Dhe, synimi i tij është që të arrijë të nënshkruaj marrëveshje si president dhe, pastaj, t’ia gjuaj barrën Parlamentit. Por, Parlamenti duhet t’ia heq këtë armë të fundit të imunitetit që po e mbanë Thaçin në pushtet. Nuk duhet ta miratojmë rolin e tij prijës në këtë dialog.

05/09/2018 20:21

Serbia ia ndaloj udhëtimin, ky është reagimi i Vjosa Osmanit